Fundargerð aðalfundar BHM 18. og 19. maí 2006
Metum menntun að verðleikum
Fimmtudagur 18. maí 2006
12:30 Skráning fulltrúa og afhending gagna.
13:00 Setning og ávarp.
Formaður BHM, Halldóra Friðjónsdóttir. (Sjá meðfylgjandi setningarræðu)
13:15 Ávörp gesta:
Ögmundur Jónasson formaður BSRB flutti kveðjur frá stjórn BSRB og þakkir fyrir gott samstarf á liðnum árum. Þakkar það sérstaklega formönnum BHM. Mikilvægt að BSRB og BHM haldist í hendur þegar lífeyrismál og önnur réttindamál eru annars vegar. Sagði stéttarfélög nú til dæmis.standa frammi fyrir umræðum um aldurstengt lífeyriskerfi. Fleiri mál nefndi Ögmundur og sagðist vona að samtökin ættu áfram góða samleið. Að lokum óskaði hann BHM velfarnaðar.
Elna Katrín Jónsdóttir varaformaður Kennarasambands Íslands óskaði BHM til hamingju með glæsilegt nýtt húsnæði. Hún sagði yfirskrift aðalfundar endurspegla aðalstarf bandalagsins frá upphafi. Að BHM væri sterkt og sýnilegt afl í samfélaginu og háskólamenn í bandalaginu gætu í krafti samsetningar þess bæði unnið að góðum málum innan sinnar stéttar og komið sameiginlega að málum þegar þarf.
Hún sagði vert að hugsa til áherslu bandalagsins á að berjast gegn launamun kynjanna. Hún ræddi um líkindi með Kennarasambandi Íslands og BHM, að KÍ hafi að mörgu leyti samskonar uppbyggingu. Sérstaklega þakkaði hún formanni Bandalags háskólamanna og öðrum gott samstarf í síðustu samningum.
Hún sagði ljóst að gott samstarf samtakanna og allra samtaka launafólks skipti öllu. Að lokum óskaði hún aðalfundi alls hins besta og þakkaði samstarf á liðnum árum.
Gylfi Arnbjörnsson frkv.st. ASÍ þakkaði fyrir að boð til forystu ASÍ að koma til þessa aðalfundar. Á þessum tíma væri þörfin fyrir samstöðu stéttarfélaga meiri en um alllangt skeið á undan, í ljósi breytinga á vinnumarkaði, t.d. alþjóðavæðingar. Undanfarinn áratugur hafi einkennst af óróleika á ýmsum sviðum. Misskipting fari vaxandi og birtist hjá ýmsum hópum. Konur-karlar, sjúklingar-heilbrigðir, landsbyggð-höfuðborgarsvæði. Á þessu þurfi verkalýðshreyfingin að taka. Nú hafi sumir það mjög gott á meðan margir hafi það mjög slæmt. Hann tiltók að mikil hætta væri á rýrnandi kjörum vegna vaxandi verðbólgu. Enginn vafi væri á að stefna stjórnvalda undanfarinn áratug hafi komið okkur í þessa stöðu. Alið hafi verið á ýmsum sérhagsmunum. ASÍ hafi varað við þessari þróun. Hann sagði að ef óvissa verði í atvinnumálum, t.d. vegna alþjóðavæðingar verði félagsmálakerfið að vera í stakk búið til að taka á því. Það hafi ekki tekist að mynda sátt um það.
Gylfi lýsti aðstæðum svona og sagði það okkar að vinna úr því. Líkur væru á erfiðleikum í kjarasamningum í haust vegna aðstæðnanna sem nefndar voru hér á undan. Þeir sem minnst hafi þurfi að treysta á verkalýðshreyfinguna til að vinna úr þessum málum.
Hann lauk ræðu sinni með óskum um velfarnað til handa BHM.
Árni Mathiesen fjármálaráðherra hóf mál sitt á að lýsa yfir að heiður væri að fá að ávarpa þetta þing. Sagðist einu sinni hafa setið í launamálaráði BHMR. Sagði að sér þætti vænt um að BHM (og þau samtök háskólamanna sem þar voru á undan) og hann hófu „ starfsemi “ á sama ári. (1958, fæðingarár ráðherra) Árni sagði samskipti BHM við ríkið og aðra vinnuveitendur sífellt opnara. Hagur okkar í framtíðinni myndi ekki síst ráðast af menntunarstigi þjóðarinnar. Sagði lykilorðin í núverandi stjórnarsamstarfi; hreyfing, stýring og sveigjanleiki, hafa þau fært okkur inn í nýja öld. Sveigjanleikinn hafi ekki síst falist í að stofnanir hafi fengið meira sjálfstæði í kjarasamningum. Í dag vilji fáir snúa til baka í gamla kerfið. Nú í maí væri enn verið að gera breytingar með það að markmiði að gera stofnunum kleift að halda í gott starfsfólk og gera vel við það. BHM ætti ekki síst þátt í því. Árni lagði áherslu á að ríkið skuli ávallt hafa gott og vel menntað starfsfólk. Sú mannauðsstefna byggi á því sjálfstæði sem stofnanir hafi nú til að fá til sín vel menntað og framsýnt fólk á hvaða sviði sem er. Þar væru félagsmenn BHM stærsti hópurinn, sérstaklega þegar litið væri til kvenna sem væru þar í meirihluta.
Árni sagði verkefni beggja aðila að starfa saman og að samstarfið verði áfram öllum til heilla. Hann lauk máli sínum með að taka undir yfirskrift fundarins: Metum menntun að verðleikum.
Aðrir gestir viðstaddir setningu og ávörp gesta:
Birgir Björn Sigurjónsson, skrifstofustjóri starfsmannaskrifstofu Reykjavikurborgar
Eiríkur Jónsson formaður Kennarasambands Íslands
Erna Guðmundsdóttir, lögfræðingur BSRB
Gunnar Björnsson, skrifstofustjóri starfsmannaskrifstofu fjármálaráðuneytisins
Gestir yfirgáfu fundinn
13:40 Kosning fundarstjóra og fundarritara.
Formaður stakk upp á Ínu Björgu Hjálmarsdóttur og Vilborgu K. Oddsdóttur sem fundarstjórum, og fundarriturum Önnu Margréti Sigurðardóttur og Þorbjörgu Jónsdóttur
Einróma samþykkt með lófataki.
13:45 Skýrsla stjórnar BHM 2004-2006 flutt: – Halldóra Friðjónsdóttir formaður BHM Sjá skýrslu Engar athugasemdir voru gerðar við skýrslu stjórnar.
14:15 Reikningar 2004 og 2005 lagðir fyrir: Stefán Aðalsteinsson framkvæmdastjóri BHM i fjarveru gjaldkera, Árna Árnasonar
Engar athugasemdir voru gerðar við reikningana.
14:25 Skýrslur og reikningar sjóða í tengslum við BHM 2004 og 2005.
Sjúkrasjóður BHM – Emil B. Karlsson fráfarandi formaður
Hóf mál sitt á að árétta mun á Sjúkrasjóði sem er fyrir félagsmenn á almennum markaði, og Styrktarsjóði sem er fyrir félagsmenn í starfi hjá hjá ríki og sveitarfélögum.
Orlofssjóður BHM - Unnur V. Ingólfsdóttir formaður
Styrktarsjóður BHM – Ingunn Sigurgeirsdóttir formaður
Fjölskyldu- og styrktarsjóður BHM, BSRB og KÍ og Hagrannsóknarstofnun samtaka launafólks í almannaþjónustu (HASLA) – Halldóra Friðjónsdóttir formaður BHM:
Halldóra sagði HASLA standa vel, 10 milljónir væru í sjóðnum nú. (Sjá skýrslu stjórnar)
Fjölskyldu- og styrktarsjóður (Sjá skýrslu stjórnar) - Hækkun í síðustu kjarasamningum og breytingar á viðmiðunarreglum.
Starfsmenntunarsjóður BHM – Skýrsla var ekki flutt en fundarmenn beðnir að kynna sér efni hennar í meðfylgjandi fundargögnum eða á Netinu.
14:55 Kaffihlé.
15:20 Skýrslur milliþinga- og fastanefnda.
Menntanefnd - Halldóra Friðjónsdóttir formaður nefndarinnar
Sjá skýrslu Árétting frá Þórólfi Antonssyni nefndarmanni um afstöðu nefndarinnar til skólagjalda: Niðurstaða nefndarinnar eftir miklar umræður var að það yrði að verja rétt manna til náms burtséð frá fjárhag.
Framtíðarnefnd - Halldóra Friðjónsdóttir
Sjá skýrslu Engar fyrirspurnir eða athugasemdir
Laganefnd - Halldóra Friðjónsdóttir
Sjá skýrslu Engar fyrirspurnir eða athugasemdir
Trúnaðarmannanefnd - Þóroddur Þórarinsson
Sjá skýrslu Nokkrar umræður urðu um hugmynd nefndarinnar að einn starfsmaður bandalagsins sjái um að halda úti heimasvæði fyrir trúnaðarmenn á heimasíðu samtakanna.
Lífeyrisnefnd - Páll Halldórsson
Sjá skýrslu Páll lagði áherslu á að bandalagið verði að vera tilbúið til umræðna um breytingar á lífeyriskerfinu. Engar fyrirspurnir eða athugasemdir
Vinnuumhverfisnefnd - Ína Björg Hjálmarsdóttir
16:00 Störf vinnuhópa hófust.
Fundarstjóri skipti hópum niður á vinnusvæði og hófu þeir störf um eftirfarandi málefni:
Aðildarmál, hópstjóri Sigríður Björnsdóttir
Lífeyrismál, hópstjóri Páll Halldórsson.
Kjaramál, hópstjóri Salóme Þórisdóttir.
Menntamál, hópstjóri Herdís Sveinsdóttir.
Sí- og endurmenntun, hópstjóri Ingi Jón Hauksson.
Trúnaðarmenn, hópstjóri Margrét Jónsdóttir.
17:30 Fundi frestað.
Föstudagur 19. maí 2006
Vilborg Oddsdóttir bauð fulltrúa velkomna og kynnti dagsdrá dagsins.
09:00 Kjara- og stofnanasamningar.
Sóknarfæri í framtíð og nútíð: Helga Birna Ingimundardóttir og Ína Björg Hjálmarsdóttir fluttu stutt framsöguerindi hvor og síðan voru umræður á eftir.
Helga Birna Ingimundardóttirbyrjaði á að gera grein fyrir breytingum á kjarasamningum aðildarfélaga BHM síðustu ár. Samningsaðilar hafi verið margir, ríkið, Reykjavíkurborg og önnur sveitafélög, Samtök fyrirtækja í heilbrigðisþjónustu (SFH) og einstakar stofnanir.
Fram kom að samtök vinnuveitenda á almennum markaði hafa ekki viljað semja á sama hátt og ríki og sveitarfélög.
Áður fyrr hafi kjarasamningar verið miðstýrðir og aðilar samið um allt frá grunni fyrir hvert félag fyrir sig. Breyting hafi orðið á þessu 1997 þegar fyrstu miðlægu kjarasamningnir voru gerðir og síðan stofnanasamaningar fyrir hvert aðildarfélag fyrir sig. Hið nýja launakerfi hafi svo verið fest í sessi 2001. Öll félögin hafi verið ánægð með miðlæga kjarasamninga. Í sameiginlegum kjarasamningum BHM sem skrifað var undir 28. febrúar 2005 hafi verið samið um nýja launatöflu sem tók gildi 1. maí 2006 og er sameiginleg fyrir öll aðildarfélögin. Í hinni nýju launatöflu skuli lægstu laun ekki vera lægri en kr 200 000 á mánuði. Síðan skuli einn stofnanasamningur gerður á hverri stofnun fyrir öll aðildarfélög BHM. Tvö aðildarfélög BHM heyri þó ekki undir þennan kjarasamning: Félag náttúrufræðinga sem ákvað að taka ekki þátt í samningagerðinni og Félag sálfræðinga sem felldu samninginn þegar hann var borinn undir atkvæði.
Helga Birna sagði að á mörgum stöðum væri búið að ganga frá nýjum sameiginlegum stofnanasamningi og að á öðrum stöðum væri sú vinna langt komin.
Að lokinni framsögu Helgu Birnu fóru fram almennar umræður og virtust fundarmenn almennt ánægðir. Fram kom athugasemd um að það væri ”betra að skipta kökunni saman en að bítast um sneiðar hver í sínu horni”. Nýju samningarnir myndu auka skilning stétta á kjörum hverrar annarrar, auka gegnsæi kjarasamningum félaga innan BHM og jafna launamun á milli strétta og kynja.
Síðan var spurt um framtíðarsýn og fyrirkomulag næstu samninga. Hverjir eru veikleikar styrkleikar, ógnanir og tækifæri þessarra samninga?
Ína Björg Hjálmarsdóttirræddi sóknarfæri í framtíð og nútíð og vandamál. Hún lagði áherslu nauðsyn þess að varast að lokast inn í einhverju sem menn sæju ekki fyrir. Helsti vandinn væri að stofnanasamningar væru gerðir undir friðarskyldu þar sem ekkert verkfallsvopn væri fyrir hendi. Launamunur milli stofnana gæti verið umtalsverður og erfitt væri að færa til stóra hópa og hópa sem vinna mikla yfirvinnu.
Hún nefndi einnig að það þyrfti að vera jafnvægi á milli ásættanlegra lágmarkslauna en að það þyrfti líka að vera hægt að umbuna góðum starfsmönnum. Það þyrfti að vera möguleiki á ákveðnu launaskriði.
Ína nefndi að nauðsynlegt væri að meta veikleika og styrkleika hins nýja launakerfis til að finna bestu leiðina og lágmarka hættu á að tekið verði upp ”aukalaunakerfi” (ýmiskonar aukasporslur) sem erfitt væri að hafa yfirsýn yfir.
Í fjarveru Ingu Rúnar Ólafsdóttur kynntu Ína Björg og Helga Birna nokkra punkta um nýju samningana til að fá fram almennar umræður.
Varðandi miðlæga kjarasamninga var spurt hvort menn sæju fyrir sér áframhaldandi samflot og aukna samvinnu í krafi stærðarinnar, jafnvel sameiningu einhverra stéttarfélaga, eða hvort menn væru búnir að fá nóg af málamiðlunum og vildu berjast hver fyrir sínu. Hvaða tækifæri menn sæu fyrir sér í framtíðinni, hvort stofnanasamningar muni þróast yfir í samninga um heildarlaun og hvað hægt væri að gera til að styðja félagsmenn aðildarfélaganna betur í baráttunni. Spurt var einnig hvort menn sæu jafnvel fyrir sér að samningsumboðið flytjist alfarið til BHM.
Um þetta sköpuðust almennar umræður
Elsa Friðfinnsdóttir formaður Félags íslenskra hjúkrunarfræðinga benti á að unnið hefði verið með BSRB og ASÍ varðandi almenn réttindi og skyldur og mikilvægt að bandalagið héldi áfram að vinna það með þeim bandalögum. Hún sagðist ekki sjá fyrir sér sameiningu félaga ólíkra stétta innan BHM
Helga Birna taldi að sameiginleg vinna félaganna við gerð stofnanasamninga hafi reynst vel og aukið virðingu hinna mismunandi stétta hver fyrir annarri.
Halldóra Friðjónsdóttir benti á að við mættum ekki halda að fullnaðasigur væri unnin nú 1. maí 2006. Gildistaka nýrrar sameiginlegrar launatöflu muni minnka muninn á launum karla og kvennastétta nú þegar allir væru inni í sömu launatöflunni. Hins vegar muni launaþróunin næstu misseri verða prófsteinn á hvernig stéttir ættu eftir að hreyfast í nýju töflunni og ef mikill munur yrði á launaskriði milli stétta innan töflunnar yrði nauðsynlegt að skoða það nánar.
Almennar umræður héldu áfram og voru fundarmenn almennt sammála um að of snemmt væri að dæma hvernig til hafi tekist með nýju samningana.
Salome Þórisdóttir formaður Þroskaþjálfafélagsins sagði samningana mjög mikilvægt skref fyrir þeirra félag en nefndi einnig að stofnanir sem þeirra félagsmenn ynnu hjá búi við mjög mismunandi aðstæður hvað varðar fjárhagsramma.
Í framhaldi af þessari umræðu um launamun á milli stofnana kom fram að ef til vill yrði auðveldara að kortleggja betur hálauna og láglaunastofnanir í nýja launakerfinu.
Að þessu loknu var varpað fram umræðupunktum varðandi stofnanasamninga.
- Hvernig sjáum við fyrir okkur framtíð stofnanasamninga?
- Eiga stofnanasamningar sér framtíð?
- Eigum við að halda áfram að þróa samvinnu stéttarfélaganna í sameiginlegum stofnanasamningum?
- Er gætt nógu vel að sjálfstæðum samningsrétti stéttarfélaganna í samningabandalögum eins og samfloti BHM?
- Vægi stofnanasamninga – eigum við að auka það eða draga úr því?
- Þarf að færa einhverja þætti sem nú eru í stofnanasamningi inn í miðlæga samninga?
- Viljum við viðhalda launamun milli stofnana ríkisins?
- Er uppskeran úr stofnanasamningunum í samræmi við vinnuna sem lögð er í þá?
- Er rétt að leggja alla þessa vinnu á félagsmenn okkar?
- Hvað eru þeir að fá fyrir félagsgjöldin?
- Eykur þátttaka félagsmanna í baráttunni stéttarvitund þeirra?
Um þetta sköpuðust nokkrar umræður og var helsta niðurstaða þeirra að mikilvægt væri að aðildarfélög bandalagsins væru dugleg að halda utan um félagsmenn sína, passa að þeim væru greidd laun skv. samningum og að fólki væri rétt raðað í launatöflu.
Einnig var bent á að mikilvægt væri að stéttarfélög þróuðust í takt við breytingar í samfélaginu – viðhorf þeirra sem útskrifist úr háskóla í dag séu önnur en hafi verið fyrir 20 árum.
Fyrirspurn barst úr sal þess efnis hvort ekki þyrfti að skoða í heild eftir einhvern tíma hvernig til hafi tekist með og var svarað að í samningunum væri endurskoðunarákvæði. Stofnanasamningar verði skoðaðir eftir eitt ár.
10:00 Kaffihlé.
10:30 Störf vinnuhópa halda áfram.
12:00 Matarhlé.
13:00 Niðurstöður vinnuhópa kynntar og tillögur afgreiddar.
Aðildarmál, hópstjóri Sigríður Björnsdóttir.
Umræður:
Spurn úr sal: Beðið var um útskýringu á aðildarhugmyndum varðandi presta og prófessora og aðra sem falla undir kjaradóm. (Sjá framlögð erindi í fundagögnum)
Sigríður svarar: Svaraði að eingöngu sé um að ræða aðild að sjóðum bandalagsins
Páll Halldórsson: Spurði hvort um væri að ræða einstaklingsaðild að sjóðunum en ekki félag viðkomandi?
Sigríður: Svaraði að prófessorar ættu aðild að orlofssjóði en engu öðru innan bandalagins.
Prófessorar væru bara að biðja um aðlild að styrktarsjóðnum og kjaradómur hafi eingöngu beðið um slíka aðild fyrir þá.
Halldóra Friðjónsdóttir: Sagði að þessi mál þyrfti að ræða vel. Breytingar á umhverfinu væru í gangi og fyrirsjáanlegar. Spyrja þyrfti hvers vettvangur bandalagið ætti að vera? Við sæjum breytingar í framtíðinni, t.d. ynnu vísindamenn meira og meira sjálfstætt. Þetta kallaði eftir frekari umræðum.
Sigríður: Sagði þessi mál hafa verið rædd í hópnum og niðurstaðan komi fram í ályktun hans.
Ekki hafi verið talið heppilegt að opna bandalagið meira eða með öðrum hætti að svo stöddu. Þetta virtist sú niðurstaða sem almennt hafi verið komist að. Að það verði að vera stéttarfélagsaðildin sem væri grundvöllur þess að fólk geti átt aðild að bandalaginu. Sumir ættu þó hvergi höfði sínu að halla, t.d. lausráðnir stundakennarar við Háskóla Íslands.
Spurn úr sal: Var rætt um slíka jaðarhópa í vinnuhópnum, t.d. aukaaðild?
Sigríður: Svarar að hópurinn hafi verið sammála um að aukaaðild væri ekki góður kostur. Félög noti þjónustuna mjög mismunandi mikið. Hópurinn óttaðist að þarna gætu farið af stað flókin vandmál sem erfitt yrði að leysa.
Elsa Friðfinnsdóttir: Talaði um að umræður og ályktanir, eins og t.d. ASÍ sendi reglulega frá sér um annarskonar starfsemi, t.d. ýmislegt í samfélaginu, menntamál, fjármál, heilbrigðismál, strandi kannski á því að við værum bandalag stéttarfélaga.
Sigríður: Sagði að í lögum bandalagsins sé ekki áskilið að það séu eingöngu stéttarfélög sem hafi aðild að bandalaginu, en þannig hafi það verið
Sigurður frá Stéttarfél matvæla- og næringarfræðinga: Spyr varðandi umsókn Sambands íslenskra myndlistarmanna (SÍM): Þarna sé sjálfstætt starfandi fólk með óreglulegar tekjur, hvernig sé með félagsgjöld?
Sigríður: Svaraði að hópurinn hafi ekki talið í verkahring sínum að fara inn í svona praktísk mál, en þó talið að félagsgjöld yrðu að vera samfelld, einu sinni í mánuði, t.d. miðað við meðallaun hjá BHM.
Kolbrún Baldursd: Ræddi um aukaaðild. Sagði að það væru breyttir tímar, ekki væri óraunhæft að upp komi að einhverjir vilji aukaaðild að bandalaginu. Spurði hvort hópurinn hafi rætt um hvernig væri hægt að koma undirbúningi að slíku í vinnslu?
Sigríður: Sagði sína skoðun að bandalagið verði að móta sér stefnu í þessum málum. Sú skoðun hafi komið fram í hópnum að eðlilegt væri að eingöngu væri um að ræða fulla aðild eða enga. Aðrar raddir heyrist líka, þ.e. að hægt væri að hafa aukaaðild, t.d. bara að sjóðum.
Spurn úr sal: Hvaða hagsmuni sjá t.d. verktakar í að vera í bandalaginu?
Þórólfur Antonsson: T.d. tryggingar, þegar margir taki sig saman og semji.
Sigríður: Sagði hópinn sjá fyrir sér kjaradeild sem sæi um svona mál, ekki þyrftu allir að koma að.
Lífeyrismál, hópstjóri Páll Halldórsson.
Umræður:
Spurn úr sal: Varðandi aldurstengingu: Margt fólk sé lengi í námi, hvort eigi að gera kröfu um að fólk geti hafið lífeyrissparnað 18 ára, burtséð frá því hvort hafin er atvinnuþáttaka?
Páll: Svaraði að þette sé einn möguleiki. Þetta þurfi að skoða þegar farið verði í alvöru að ræða aldurstenginguna. Nauðsynlegt sé að fara að skoða þessa möguleika
Halldóra Friðjónsdóttir: Um breytingu yfir í aldurstengt kerfi: Það sé mjög margt sem við vitum ekki enn, t.d. þurfum við að fá útreikninga á hvað það tákni að hafa töluvert hærri tekjur. Háskólafólk sé t.d. yfirleitt með hærri tekjur en þeir sem fari ekki í nám og hefja atvinnuþátttöku fyrr.
Páll. Þessu þarf að halda til haga.
Spurn úr sal: Hefur verið rætt um sköttun lífeyris? Þetta virðist misjafnt milli landa.
Páll: Svaraði að mismunandi reglur giltu um skattlagningu lífeyris en líka um skattlagning á þeim peningum sem greiddir eru inn í lífeyrissjóði. Hann geti ekki sett neitt niður um þetta í einni setningu. Aðalmálið væri að það sé hægt að finna alls kyns dæmi og tekjutengingamálin eru erfiðust.
Spurn úr sal: Verður ályktun hópsins borin upp fyrir aðalfundinn?
Elsa Friðfinnsdóttir: Ræddi um að bætur almannatrygginga væru misjafnar milli flokka og skerðingin mismikil milli flokka. Spurði hvort rætt væri um að fella allt slíkt niður? Hvort ekki væri skynsamlegt að beina því til stjórnvalda að breyta skerðingarákvæðum þannig að dregið verði úr þeim en þau ekki felld alfarið niður.
Páll: Svaraði að ekki væri talað um að fella niður allar tekjutengingar, en þetta væri auðvitað vandamál.
Stefán Aðalsteinssonfrkvst: Sagðist vilja koma inn á tvo mikilvæga punkta: Í fyrsta lagi það sem Elsa hafi talað um, þ.e. hvort tekjutenging eigi ekki rétt á sér í aldurstengda kerfinu á einhvern hátt.
Sigurður frá Stéttarfél. Matvæla- og næringarfræðinga: Sagðist leggja áherslu á að þetta yrðu ekki skörp skil þannig að ef menn ynnu sér inn einhverjar krónur eftir lífeyristöku væri það strax farið aftur í skatta. Kerfið mætti ekki vinna á móti sjálfsbjargarviðleitni hjá fólki.
Elsa Friðfinnsdóttir: Sagði þetta mjög flókið kerfi, við værum hér komin í bullandi samfélagspólitík. Hér væri verið að tala um að hækka skerðingarmörkin þannig að menn gætu haft meiri tekjur áður en til skerðingar kemur, líka væri verið að tala um hvað aldraðir greiddu með sér inn á heimili fyrir aldraða. Alls kyns mismunun væri þar. Þetta væru mjög flókin mál og hún teldi ekki að fundurinn ætti að ályta um þessi mál öll.
Páll. Sagði þetta rétt hjá Elsu, þetta væri flókið mál og pólitískt, þ.e. hvernig menn vildu hafa tekjutengingu. Tekjutenging hafi verið mjög til umræðu í samfélaginu. Sagðist myndu kjósa að dregið yrði úr henni en þó haldið til haga. Ekki væri hægt að fara frá málinu eins og það sé ekki til.
Ingi Jón Sálfræðingafélagin: . Sagðist leggja til að fundurinn ályktaði að leggja niður tekjutenginguna.
Stefán Aðalsteinsson: Annar punkturinn sem hann vildi gera athugasemd við væri punktur 2 í ályktun hópsins um lífeyrismál: Sagðist vilja heyra hvor umræða hafi átt sér stað um hvort yfir höfuð væri hægt að hafa tvö mismunandi kerfi í gangi og hvort þeir sem færu úr opinbera geiranum yfir á almennan markað væru að fara illa út úr þessu.
Páll: Sagði þetta hafa verið rætt. Hópurinn hafi talið að bandalagið ætti ekki að beita sér fyrir að taka upp aldurstengingu en ætti hins vegar að vera tilbúið að koma inn í þá umræðu. Ekki að bandalagið hafi frumkvæði að umræðunni.
Kjaramál, hópstjóri Salóme Þórisdóttir.
Umræður:
Ingi Jón, Sálfræðingafélaginu: Sagðist styðja eindregið að gerð yrði kjarakönnun. Ljóst væri að bandalagið væri með góðan grunn sem hægt væri að vinna úr og fá reglulega upplýsingar.
Margrét frá Stéttarfélagi matvælafræðinga: Sagði að ekki sæist allt í grunni Bókunar- og innheimtumiðstöðvar BHM (BIB), t.d. ekki matarpeningar, ökutækjastyrkir o.s.frv.
Halldóra: Sagðist sammála Inga Jóni að bandalagið þyrfti að nota BIB betur. En það þyrfti líka að fá betri upplýsingar frá ríkinu, t.d. um starfshlutfall o.fl. Fundur yrði næsta þriðjud (23.maí) og vonandi að eitthvað færi að gerast í þessum málum. Sagði Útgarð hafa gert kjarakönnun meðal sinna félagsmanna og að félagið ætti nú þegar grunn sem öðrum félögum stæði til boða. Sagði að hafa yrði í huga að ekki vildu allir taka þátt í svona kjarakönnunum. Sagði að nauðsynlegt væri að hafa bæði kannanir og þær tölur sem væru fyrir hendi í gagnagrunnum eins og BIB.
Menntamál, hópstjóri Herdís Sveinsdóttir.(Ragnhildur flutti álytktun)
Umræður:
Nokkrir punktar komu fram frá hópnum og umræður sköpuðust um hvað væru ályktanir og hvað væru tillögur. Lagt var til að hópurinn settist niður í kaffihléi og byggi til ályktun úr mikilvægustu punktunum, öðru yrði beint til stjórnar. Almennt virtust fundarmenn vilja leggja áherslu á ályktun um skólagjöld og aukin framlög ríkisins til Háskóla Íslands.
Spurn úr sal: Hvort rætt hafi verið um Bologna áætlunina í hópnum?
Svar. Svarað var að hún hafi verið rædd lítið í hópnum um morguninn, og lítillega daginn áður, en ekki hafi verið sett neitt niður á blað.
Sí- og endurmenntun, hópstjóri Ingi Jón Hauksson.
Umræður:
Kristín Hafsteinsd. Félagi lífeindafræðinga: Sagði lífeindafræðinga hafa verið stolta af því símenntunarkerfi sem tengdist gamla skólanum þeirra, Tækniháskóla Íslands. Nú væru þeir í Háskóla Íslands, og þar væru námskeið sem væru mjög dýr. Sagðist halda að torsótt yrði að fá meira inn í Vísindasjóð, en ljóst væri að endurmenntun væri nauðsynleg, en hún væri mjög dýr.
Ingi Jón: Sagðist sammála um að torsótt yrði að fá meiri peninga inn í Vísindasjóði.
Spurn úr sal: Hvort rætt hafi verið hvort það yrði metið til launa ef menn öfluðu sér endurmenntunar?
Svar: Það væri gert sumsstaðar, t.d. hjá Reykjavíkurborg, en þar væri þak.
Halldóra Friðjónsd.: Sagði eitt vera viðbótarmenntun, annað væri viðhald á þeirri menntun sem fólk hefði fyrir. Það þyrfti að gera greinarmun á þessu.
Ingi Jón: Sagði símenntun geta verið skilgreinda þannig að fólk væri að viðhalda færni. Þetta væri háð fagstéttum, t.d. þyrftu tölvunarfræðingar að endurmennta sig annað hvert ár vegna mikilla breytinga í faginu.
Spurn úr sal: Hvort hópurinn hafi rætt skylduhlutann þannig varðandi stéttir með löggildingu og starfsleyfi, að leyfin yrðu tímabundin og það þyrfti að sýna fram á símenntun til að viðhalda starfsleyfi?
Ingi Jón: Svaraði að þetta hafi verið lítillega rætt. En það hljóti að vera augljóst þegar starfsmaður sem ekki sinnir símenntun virkar ekki lengur í starfi.
Aðalbjörg frá Félagi íslenskra hjúkrunarfræðinga (var í hópnum): Sagði það ætti að vera skylda starfsmannsins að skila fenginni þekkingu af sér til samstarfsmanna, að þetta snerist ekki um að sýna fram á endurmenntun til að viðhalda starfsleyfi.
Kolbrún Baldursd.: Vísaði til gamalla samninga hjá sveitarfélögunum, þar sem fólk gat bætt við sig launaflokkum með námskeiðum og annarri símenntun. Sagði það hafa verið mjög gott. Það ætti ekki að vera þannig að fólk þyrfti að grenja það út að fá að fara á námskeið. Þetta ætti að vera sjálfsagður hlutur og metnaður fyrirtækja að passa upp á þessa hluti.
Ingi Jón. Sagði hópinn hafa verið sammála um að þetta ætti að vera metnaður stjórnenda og að fólk ætti ekki að þurfa að gráta þetta út. Þess vegna væri þessi ályktun.
Trúnaðarmenn, hópstjóri Margrét Jónsdóttir.
Sjá ályktun
Umræður:
Úr sal: Upplýst var um að kvörðun hefði verið tekin hjá bandalaginu um að koma upp vefsvæði fyrir trúnaðarmenn.
Umræða utan dagskrár:
Ingi Jón Hauksson, Sálfræðingafélaginu bað um tíma til að ræða mál Styrktar- og sjúkrasjóða utan dagskrár.
Fundarstjóri samþykkti
Ingi Jón: Sagðist hafa áhyggjur af að sjóðirnir safni fé og það þyrfti að vera skýrara hver tilgangur þeirra væri, þannig að þeir sem virkilega væru þurfandi fái úr þessum sjóðum. Skoða þyrfti styrkina, ef þetta væri leikur til að hækka innkomu þyrfti að finna skilvirkari leiðir til að þetta kæmi í launaumslagið hjá félagsmönnum.
Halldóra: Sagði sjúkrasjóð lögbundinn fyrir fólk á almennum markaði og hafi komið til vegna lélegrar stöðu þess fólks. Hún sagði alltaf þurfa að skoða hvernig þessir sjóðir gætu nýst til að mæta raunverulegri þörf. Bandalagið yrði ekki trúverðugt í ályktun um skattleysi á þessa styrki ef styrkirnir væru ekki látnir ganga til verðugra verkefna.
Það þyrfti líka að velta fyrir sér hversu sjálfstæðar stjórnir sjóðanna ættu að vera.
Úr sal (Jóhanna starfsmaður BHM): Beindi því til fundar að ársfundur sjóðanna ætti að vera góður vettvangur til að álykta um svona mál og hvatti félögin til að mæta á fundina og nýta sér þá til upplýsingar.
Sigríður Björnsdóttir: Sagðist vera með ársreikningana fyrir framan sig og sæi ekki að fé safnaðist saman í Styrktarsjóðnum.
Halldóra: Sagði það vera í Sjúkrasjóðnum sem fé safnaðist saman.
Fulltrúi úr sal: Sagðist ekki vera sammála með líkamsræktarstyrkina, önnur félög væru með svona styrki, að 25 þúsund krónur fyrir gleraugu eða líkamsrækt skipti máli fyrir manneskju með 200 þúsund króna mánaðarlaun.
Kolbrún Baldursd.: Sagðist sammála Inga Jóni. Þetta væri komið út í öfgar.
Kristbjörn Egilsson: Sagði þennan styrk auðvitað aðallega nýttur af konum, en sagðist hafa sótt um styrkinn í tengslum við krabbameinsrannsókn sem hann þurfti að fara í. Styrkurinn hafi bara verið upp í sjálfa skoðunina en hafi verið dropi í hafið við kostnað af rannsókn og heimsóknir til lækna í tengslum við hana. Þetta hafi líka kostað svo mikla vinnu að það borgaði sig ekki. Það þyrfti að endurskoða þetta þannig að styrkurinn skipti máli þegar fólk þyrfti á því að halda.
Ingi Jón: Sagði hér væri verið að viðhalda styrkjakerfi við hlið almannatrygginga. Við þyrftum að ræða þetta því þetta væri hluti af kjarasamningum okkar.
Hér voru umræður stöðvaðar þar sem komið var að kaffihléi.
15:00 Kaffihlé.
15:30 Afgreiðsla mála.
Aðildarumsóknir
Stefnuskrá og starfsáætlun
Fjárhagsáætlun og ákvörðun árgjalds
Breytingar á lögum, skipulagsskrám og reglugerðum.
Ályktanir:
Lífeyrismál – Páll Halldórsson
Samþykkt samhljóða
Kjaramál –Salóme Þórisdóttir
Samþykkt samhljóða
Menntamál – nafn
Elsa Friðfinnsdóttir lagði til að fyrsti hluti ályktunar um menntamál yrði borinn upp sérstaklega með tilvísun í umræður frá aðalfundi BHM 2004 – sú tillaga var samþykkt með einu mótatkvæði.
Síðari hluti ályktunar menntahóps var samþykkt samhljóða.
Halldóra Friðjónsdóttir formaður BHM bar upp ályktun frá stjórn um launamun kynjanna:
Tillagan var samþykkt samhljóða eftir breytingatillögur og umræður um orðalag.
Ályktun um skattlagningu styrkja úr sjúkra- og styrktarsjóði
Samþykkt samhljóða
Aðildarmál
Samþykkt samhljóða.
Rætt var um aðild Félags Prófessora við HÍ og Prestafélags Íslands að styrktarsjóði bandalagsins. Þetta var samþykkt, enda stæði sjóðurinn straum af þeim kostnaði sem af rekstri hans hlytist hjá bandalaginu.
Aðildarumsóknir.
Aðildarumsókn Sambands íslenskra myndlistarmanna (SÍM) að BHM var samþykkt með þeim skilyrðum að fyrst kæmi SÍM sér upp kjaradeild með aðstoð BHM og að endanleg innganga væri háð samþykki miðstjórnar BHM.
Samþykkt með einu mótatkvæði.
Stefnuskrá og starfsáætlun
Halldóra kynnti starfsáætlun BHM fyrir árin 2006-2008 og fór í gegnum áhersluatriði.
Nokkrar umræður sköpuðust og Ína Björg lagði til að tillaga um að halda kjararáðstefnu í upphafi árs 2007 yrði sett inn í starfsáætlun. Á kjararáðstefnu yrði metin staða núverandi samninga og yrði niðurstaðan notuð í áframhaldandi stefnumótun BHM.
Elsa Friðfinnsdóttir benti á að samhengi væri á milli starfsáætlunar og fjárhagsáætlunar – að liðir í starfsáætlun þyrftu að vera inni í fjárhagsáætlun.
Einnig kom ábending úr sal þess efnis að stefnumóturnarvinna aðildarfélaga þyrfti að vera í takt við stefnumótun BHM og öfugt.
Starfsáætlunin var samþykkt samhljóða svo og að sett yrði á laggirnar nefnd sem ynni að stefnumótun. Sú nefnd skuli skila niðurstöðu haustið 2007.
Fjárhagsaætlun
Stefán gerði grein fyrir fjárhagsáætlun – sjá einnig forsendur
Lögð fyrir miðstjórn í des 2005 – lítið breytt
Fram kom að mikil hækkun hafi orðið á rekstrarkostnaði á milli ára sem rekja mætti annars vegar til nýafstaðinna kaupa og endurbóta á húsnæði og hins vegar til flutninga í nýtt húsnæði.
Lagt var til að árgjald yrði óbreytt næstu tvö árin
Fyrirspurn kom úr sal um hvað átt væri við með liðnum ’sérverkefni’
Svar: vinna við gagnagrunn, utanaðkomandi ráðgjöf og skýrlsugerð – miðstjórn ákvarði í hvað þetta færi. Það eina sem væri eyrnamerkt væri söguritunin.
Fjárhagsáætlun var samþykkt samhljóða
Árgjald var einnig borið undir atkvæði og samþykkt samhljóða
Breyting á skipulagsskrá sjúkrasjóðs – Emil Karlsson
Samþykkt samhljóða
Breyting á skipulagsskrá styrktarsjóðs – Stefán Aðalsteinsson
Stefán útskýrði að breytingatillaga á skipulagsskrá styrktarsjóðs væri samhljóða skipulagsskrá sjúkrasjóðs að öðru leyti en því að þar væri talað um 3 mánuði í stað 6 mánaða. Ástæða þess væri sú að forsvarsmenn styrktarsjóðs vildu ekki taka stærra skref í einu heldur skoða hvaða áhrif þessi breyting hefði.
Breytingatillagan var samþykkt samhljóða
Kjör í trúnaðarstöður.
Kjör formanns
Halldóra Friðjónsdóttir, Útgarði engin mótframboð
Kjör varaformanns
Elsa B Friðfinnsdóttir, FÍH samþ
Kjör 5 stjórnarmanna og eins til vara.
Þóroddur Þórarinsson, ÞÍ
Einar Sveinbjörnsson, FÍN
María Frímannsd, SBU
Eggert Lárusson, KHÍ
Krisín Hafsteinsd, FL
Varamaður
Heiða Björk Jósefsdóttir, KVH
Kjör tveggja skoðunarmanna reikinga og eins til vara.
Björn Arnar Magnússon
Gunnar Gunnarsson
Til vara: Margrét Geirsdóttir
Önnur mál.
Sif Traustadóttir (DÍ) færði Halldóru Friðjónsdóttur formanni BHM gjöf, krónu konunnar
Sif talaði einnig um að það hafi veri óljóst hvað ætlast hafi verið til af vinnuhópunum, hlutverk þeirra hafi ekki komið nægilega vel fram í upphafi. Þessi athugasemd var tekin til greina af stjórn og ákveðið að vinnuhópar yrðu betur undirbúnir á næsta aðalfundi.
Því næst þakkaði Stefán fráfarandi stjórn fyrir vinnuframlag þeirra í þágu BHM og færði þeim blómvönd.
17:00 Fundi slitið
