Erna ráðin framkvæmdastjóri BHM

15.3.2017

  • Erna-Gudmundsdottir
    Erna-Gudmundsdottir

Stjórn Bandalags háskólamanna (BHM) hefur ráðið Ernu Guðmundsdóttur í stöðu framkvæmdastjóra bandalagsins. Erna er fædd árið 1970 og hefur verið lögmaður BHM í um áratug eða frá árinu 2007. Fyrstu sjö árin var hún jafnframt lögmaður Kennarasambands Íslands eða allt til ársins 2014 þegar hún var ráðin í fullt starf hjá BHM. Á árunum 1999 – 2007 var hún lögmaður BSRB og var einnig um skeið forstöðumaður starfsmannasviðs Tollstjóra.

Erna lauk embættisprófi í lögfræði frá Lagadeild Háskóla Íslands árið 1999 og öðlaðist réttindi til að vera héraðsdómslögmaður árið 2001. Hún hefur einnig lokið BA-prófi í stjórnmálafræði frá Háskóla Íslands. Hún hefur setið í fjölmörgum nefndum og vinnuhópum á vegum BHM, m.a. í samninganefndum vegna kjaraviðræðna. Þá hefur hún setið í stjórn Vinnueftirlitsins frá árinu 2015, samráðsnefnd velferðarráðuneytisins vegna EES-samningsins frá árinu 1999 og sat í ráðgjafarnefnd EFTA á árunum 1999–2006.

Erna er gift Friðþjófi I. Jóhannessyni húsasmíðameistara og eiga þau fjóra syni. Hún hefur störf sem framkvæmdastjóri BHM næstkomandi föstudag, 17. mars. 

„Það er mikið ánægjuefni að Erna hafi þegið boð stjórnar BHM um að taka að sér starf framkvæmdastjóra bandalagsins. Hún á að baki farsælan feril sem lögmaður bandalagsins í tæpan áratug og hefur mjög yfirgripsmikla þekkingu á málefnum vinnumarkaðar. Ég er sannfærð um að ráðning hennar í starf framkvæmdastjóra mun reynast heillaspor fyrir bandalagið,“ segir Þórunn Sveinbjarnardóttir, formaður BHM.