Leggjumst öll á eitt!

Atvinnurekendur komi til móts við barnafólk vegna skertrar kennslu í skólum

20.3.2020

Bandalag háskólamanna hefur sent frá sér svohljóðandi yfirlýsingu:

BHM skorar á vinnuveitendur að taka tillit til foreldra leik- og grunnskólabarna sem ekki geta sinnt störfum sem skyldi vegna skertrar kennslu í skólum landsins. Margir foreldrar reyna að sinna fjarvinnu ásamt því að annast heimakennslu barna sinna. Það gefur augaleið að slíkt getur reynst flókið og umönnun yngstu barnanna þarf að njóta forgangs á heimilinu. Við þessar aðstæður hefur launafólk neyðst til að ganga á orlofsrétt sinn og jafnvel taka launalaust leyfi frá vinnu. Að mati BHM er það óviðunandi.

BHM biðlar því til stjórnenda fyrirtækja og stofnana að koma til móts við það starfsfólk sem glímir við þessar aðstæður og greiða því full laun meðan samkomubann gildir hér á landi. Með því móti sýna atvinnurekendur samfélagslega ábyrgð í verki.

Öll getum við lagst á eitt um að létta þessar vikur fyrir fólkið, fyrirtækin og heimilin í landinu. Þegar það versta er yfirstaðið verður gott að geta litið um öxl fullviss um að allt hafi verið gert til að tryggja atvinnuöryggi, rekstur fyrirækja og almenna velferð landsmanna á tímum COVID-19 heimsfaraldursins.