Vinnumálstofnun bregst við dómi Hæstaréttar um bótatímabil atvinnuleysistrygginga

27.6.2017

  • vmst_logo

Hæstiréttur Íslands úrskurðaði nýlega að Alþingi hafi verið óheimilt að stytta bótatímabili atvinnuleysistrygginga úr 36 mánuðum í 30 mánuði
hjá þeim einstaklingum sem höfðu virkjað rétt sinn til atvinnuleysisbóta fyrir 1. janúar 2015. Alþingi samþykkti umrædda skerðingu í árslok 2014 og var áætlað að með henni myndi ríkið spara um 1,1 milljarð króna.

Vinnumálastofnun hefur þegar leiðrétt bótatímabil hjá þeim einstaklingum sem virkjað höfðu rétt sinn til atvinnuleysisbóta fyrir 1. janúar 2015 og þiggja bætur frá stofnuninni í dag. Stofnunin mun á næstunni setja sig í samband við fyrrverandi bótaþega sem dómur Hæstaréttar hefur mögulega áhrif á, í því skyni að leiðbeina þeim um hugsanlegan rétt sinn til atvinnuleysisbóta.

Öllum fyrirspurnum vegna dóms Hæstaréttar sem og beiðnum um hugsanlegar greiðslur atvinnuleysisbóta skal beina til Greiðslustofu Vinnumálastofnunar á greidslustofa@vmst.is. Enn fremur þurfa þeir sem ætla að óska eftir greiðslum atvinnuleysisbóta afturvirkt að fylla út þar til gert eyðublað á vefsíðu Vinnumálastofnunar. Nálgast má eyðublaðið með því að smella hér.

Leitast við að dreifa álagi hjá stofnuninni

Vinnumálastofnun mun nú á næstu vikum setja sig í samband við alla þá sem fullnýttu 30 mánuði af bótatímabili sínu eftir 1. janúar 2015 og fram til 1. júní 2017. Stofnunin mun hafa samband við þá einstaklinga sem kunna að eiga rétt til bóta eftir því hvenær viðkomandi fullnýtti 30 mánaða bótarétt sinn. Er það gert til að dreifa álagi hjá stofnuninni og einnig til að einstaklingar þurfi ekki að bíða um of eftir því að fá niðurstöðu vegna beiðni sinnar.

Vinnumálastofnun hefur nú þegar hafið vinnu við að hafa samband við alla þá sem fullnýttu bótatímabil sitt frá apríl til júní 2017. Í þessari viku verður haft samband við þá sem fullnýttu bótatímabil sitt á tímabilinu janúar til mars 2017. Í kjölfar þess mun stofnunin hafa samband við þá sem fullnýttu bótatímabil sitt á tímabilinu janúar til apríl 2015 o.s.frv. þar til að stofnunin hefur haft samband við alla þá sem fullnýtt hafa bótatímabil sitt eftir 1. janúar 2015. Er það markmið Vinnumálastofnunar að búið verði að hafa samband við alla fyrir lok septembermánaðar. Enn fremur er það markmið Vinnumálastofnunar að hafa lokið greiðslu atvinnuleysisbóta til allra þeirra sem eiga rétt til þess á grundvelli dóms Hæstaréttar eigi síðar en í byrjun nóvember nk.