Fræðsludagskrá haustsins hjá BHM hefur nú litið dagsins ljós og hefur verið opnað fyrir rafræna skráningu á vefnum okkar.  Dagskráin er unnin á vegum stýrihóps BHM um fag- og kynningarmál og byggir á þrenns konar áherslum við efnisval.  Fræðslunni er þannig ætlað að mæta þörfum félagsmanna hvað varðar:

-að styrkja stöðu sína á vinnumarkaði, 

-frumkvöðlastarf og hvernig koma má þekkingu sinni á framfæri, 

- og leiðir til að bæta líðan í starfi og daglegu lífi.

Trúnaðarmannafræðsla:

Að venju er boðið upp á grunnnámskeið fyrir trúnaðarmenn þar sem farið er yfir helstu þætti sem þeir þurfa að kunna skil á.  Námskeiðin eru tilvalinn vettvangur til að hitta aðra trúnaðarmenn og bera saman bækur sínar og endar dagurinn jafnan á "trúnó" á kaffistofu BHM, þar sem allir trúnaðarmenn eru boðnir velkomnir, ásamt starfsfólki BHM og aðildarfélaga.

Í vor var gerð tilraun með sérstakt námskeið um sjóði þá sem félagsmenn eiga aðild að og mæltist hún vel fyrir.  Í haust verður slíkt námskeið annars vegar haldið hér í Borgartúninu og hins vegar á Akureyri.  Dagsetning sjóðadagsins fyrir norðan verður kynnt bráðlega.

Trúnaðarmenn eru hvattir til að nýta sér námskeiðin um einelti (haldið í Borgartúni) og fíknisjúkdóma (haldið á Akureyri), en þau eru opin öllum félagsmönnum.

Vísindaferðir BHM

Félagsmönnum úr ólíkum starfshópum innan BHM verður í haust gefinn kostur á að "sýna sig og sjá aðra" undir yfirskrift vísindaferða.  Að þessu sinni verða það bókasafns- og upplýsingafræðingar, náttúrufræðingar og hljómlistarmenn sem bjóða "heim" og kynna sín störf og eru þeim fyrirfram færðar þakkir fyrir gestrisnina. 

Minnt er á að námskeiðin eru opin öllum félagsmönnum (nema annað komi fram) og þátttakendum að kostnaðarlausu.

Skráning er rafræn á www.bhm.is og upplýsingar veitir Jóna Jónsdóttir, móttökufulltrúi BHM á netfanginu jona@bhm.is og í síma 5812090