Aðalfundur IÞÍ samþykkti ný heildarlög félagsins

17.3.2021

  • Thora Leos
    Þóra Leósdóttir, formaður Iðjuþjálfafélags Íslands

Aðalfundur Iðjuþjálfafélags Íslands (IÞÍ) var haldinn 12. mars sl.  gegnum fjarfundabúnað og var vel sóttur miðað við aðstæður. Kosið var í stjórn og nefndir auk þess sem ný heildarlög félagsins voru samþykkt. Nýju lögin fela í sér töluvert breytt skipulag á starfsemi félagsins. Þóra Leódsóttir hefur gegnt formennsku í félaginu síðan 2019 og er sjálfkjörin til næstu tveggja ára þar sem ekki barst mótframboð. Í lok fundarins samþykkti félagsfólk eftirfarandi ályktun einróma:

„Aðalfundur IÞÍ 2021 fagnar sérstaklega nýlegu áliti umboðsmanns Alþingis um að túlkun úrskurðarnefndar velferðarmála á því að hjálpartæki sé ekki nauðsynlegt ef sjúkratryggð manneskja kemst af án þess, þrengi með fortakslausum hætti að þeim tilgangi og undirliggjandi réttindum sem lög nr. 112/2008 ná yfir.

Iðjuþjálfar hér á landi hafa árum saman barist fyrir því að fatlað fólk á öllum aldri fái sanngjarna styrki til að kaupa hjálpartæki sem efla iðju þess og þátttöku í samfélaginu, auka lífsgæði og bæta heilsu.

Álitið er afar þýðingarmikið í ljósi mannréttinda og þeirrar kröfu að allt fólk njóti jafnra tækifæra til iðju sem er því mikilvæg í daglegu lífi.“

 

Hér má finna það álit og bréf umboðsmanns Alþingis sem um ræðir.


Fréttir