BHM hvetur formenn stjórnmálaflokka til að beita sér fyrir lagasetningu um lífeyrismál

BHM hefur sent formönnum sjö stjórnmálaflokka bréf þar sem þeir eru hvattir til að beita sér fyrir því að breytt fyrirkomulag lífeyrismála opinberra starfsmanna verði lögfest um leið og nýtt þing kemur saman eftir kosningar. 

26.10.2016

  • Unnin_mynd3

Í bréfinu er rifjað upp að í september sl. undirrituðu bandalög opinberra starfsmanna samkomulag við ríki og sveitarfélög um breytingar á skipan lífeyrismála. Nokkru síðar hafi drög að frumvarpi sem byggði á samkomulaginu verið kynnt aðilum þess. Þá hafi komið í ljós að frumvarpsdrögin voru ekki að öllu leyti í samræmi við ákvæði samkomulagsins. Sérfræðingar bandalaganna hafi gert athugasemdir við þetta en ekki hafi verið tekið tillit til þeirra í ráðuneytinu. Eftir að frumvarpið hafi verið tekið til meðferðar á Alþingi hafi BHM sent ítarlega umsögn um það til fjárlaganefndar með breytingartillögum. Hins vegar hafi ekki tekist að ljúka afgreiðslu málsins á Alþingi fyrir þingfrestun. Síðan segir orðrétt:

,,Eftir nokkra daga verður kosið til Alþingis. Nýtt þing hefur möguleika á því að ljúka þessu máli með farsælum hætti og í góðri sátt við bandalög opinberra starfsmanna. Með bréfi þessu vil ég hvetja þig og þín stjórnmálasamtök til að beita sér fyrir slíkri lausn um leið og nýtt þing kemur saman. Bandalag háskólamanna er reiðubúið að leggja sitt af mörkum til að unnt verði að skapa sátt um lagasetningu fyrir áramót í samræmi við samkomulag það sem fulltrúar ríkis, sveitarfélaga og bandalaga opinberra starfsmanna undirrituðu 19. sept. sl."

Undir bréfið ritar formaður BHM, Þórunn Sveinbjarnardóttir.

Texti bréfsins í heild sinni.


Fréttir