Samstaða um bætt lífskjör öryrkja

Sameiginleg yfirlýsing BHM, ASÍ, BSRB, KÍ og ÖBÍ

19.5.2020

  • 20200519_134449
    Undirritunin fór fram í húsakynnum Öryrkjabandalags Íslands
  • 20200519_134332
  • 20200519_134456
  • 20200519_134035

Formaður BHM, Þórunn Sveinbjarnardóttir, undirritaði í dag yfirlýsingu ásamt forystumönnum þriggja heildarsamtaka launafólks og formanni Öryrkjabandalags Íslands þar sem þess er krafist að hagur öryrkja verði bættur með tilteknum aðgerðum. 

Í fyrsta lagi er þess krafist að lágmarksframfærsla öryrkja verði hækkuð, í öðru lagi að skerðingar á tekjum þessa hóps vegna atvinnuþátttöku verði endurskoðaðar og í þriðja lagi að öryrkjum verði tryggð störf með viðeigandi aðlögun og sveigjanleika.

Auk formanns BHM undirrituðu yfirlýsinguna þau Drífa Snædal, forseti Alþýðusambands Íslands (ASÍ); Sonja Þorbergsdóttir, formaður BSRB; Ragnar Þór Pétursson, formaður Kennarasambands Íslands (KÍ) og Þuríður Harpa Sigurðardóttir, formaður Öryrkjabandalags Íslands (ÖBÍ).

Yfirlýsingin er eftirfarandi:

Fyrsta heimsmarkmið Sameinuðu þjóðanna er að útrýma fátækt í allri sinni mynd allsstaðar. VIð getum ekki kallað samélagið okkar velferðarsamfélag nema allir njóti mannsæmandi lífs og enginn sé skilinn eftir í fátækt. Það á ekki síst við á tímum endurreisnar sem nú fara í hönd að loknum COVID-19 faraldrinum. Það er hagur allra að bæta kjör öryrkja og sjá til þess að enginn sé dæmdur til fátæktar þó starfsgeta láti undan. Að festast í fátæktargildru hefur áhrif á starfsgetu til framtíðar. Það er dýru verði keypt, ekki bara fyrir einstaklinga heldur fyrir samfélagið allt að svipta fólk virðingu og getu til athafna. 

Lítið svigrúm er fyrir fatlað og langveikt fólk á íslenskum vinnumarkaði. Til að sem flestir geti notið sín á vinnumarkaði þarf þröskuldurinn að vera lægri. Öryrkjum má ekki hefnast fyrir það fjárhagslega að reyna getu sína í starfi þannig að þeir verði jafnvel verr settir eftir.
Heildarsamtök launafólks og Öryrkjabandalag Íslands standa saman að því að krefjast þess að hagur öryrkja verði bættur, öllum til hagsbóta.

Kröfurnar eru skýrar:
1. Lágmarksframfærsla öryrkja verði hækkuð þannig að fólki sé gert kleift að lifa mannsæmandi lífi. 
2. Skerðingar verði endurskoðaðar þannig að þær standi ekki í vegi fyrir þátttöku á vinnumarkaði, hvort sem er að hluta eða tímabundið og að dregið verði úr tekjuskerðingum vegna lífeyristekna. 
3. Störf með viðeigandi aðlögun og sveigjanlegum vinnutíma verði tryggð fyrir fólk með skerta starfsgetu.