Stjórnvöld framlengi heimild til að greiða séreignarsparnað inn á húsnæðislán

Yfirlýsing frá BHM

25.3.2021

BHM hefur sent frá sér yfirlýsingu þar sem stjórnvöld eru hvött til að framlengja heimild sem fólk hefur til að greiða séreignarsparnað sinn skattfrjálst inn á húsnæðislán. Jafnframt hefur BHM sent frá sér greiningu þar sem nánar er fjallað um málið.

Yfirlýsingin er eftirfarandi:

BHM hvetur stjórnvöld til að framlengja heimild húsnæðiseigenda til að greiða séreignarsparnað skattfrjálst inn á húsnæðislán til ársins 2023 hið minnsta. Að óbreyttu mun heimildin falla úr gildi 30. júní nk. Með þessu móti geta stjórnvöld komið til móts við heimili landsins á tímum aukinnar efnahagsóvissu og skerts afkomuöryggis. Að mati BHM er framlenging einnig mikilvæg til að vega upp á móti áhættu heimila af vaxtahækkunum á næstu árum og mikilli skuldsetningu. Enn fremur telur bandalagið að á þennan hátt gætu stjórnvöld komið áfram til móts við ungt fólk sem fest hefur kaup á húsnæði á undanförnum áratug og getur ekki nýtt sér nýlega tilkominn stuðning stjórnvalda vegna fyrstu kaupa. Stór hluti þessa hóps, ekki síst ungt háskólamenntað fólk, sér fram á verulega aukna óvissu um afkomu sína og getu til að standa undir greiðslubyrði vegna húsnæðislána á næstu árum.

Jafnframt hvetur BHM háskólamenntað fólk til að nýta úrræðið í ríkari mæli en til þessa en samkvæmt tölum frá því í lok árs 2018 hafði minna en þriðjungur vinnumarkaðar nýtt sér skattfrjálsa ráðstöfun séreignarsparnaðar til að greiða niður húsnæðislán.

Sjá einnig Greining BHM - Mikilvægi skattfrjálsrar ráðstöfunar fyrir heimili landsins


Fréttir