„Vil strax hefjast handa við að bæta, breyta og byggja upp bandalagið“

Ræða Friðriks Jónssonar, nýkjörins formanns BHM, á aðalfundi bandalagsins

27.5.2021

  • bhm_adalfundur_2021_portret_a-2

„Með fulltingi ykkar vil ég strax hefjast handa við að bæta, breyta og byggja bandalagið upp þannig að það geti betur þjónað okkur í þeim fjölbreyttu verkefnum sem framundan eru,“ sagði Friðrik Jónsson, nýkjörinn formaður BHM, meðal annars í ræðu sinni á aðalfundi bandalagsins sem haldinn var í dag. Á fundinum tók Friðrik formlega við embætti formanns en rafrænu formannskjöri lauk á þriðjudag þar sem Friðrik hlaut tæplega 70% atkvæða .

Hann sagði að hefja þyrfti vinnu við endurmótun innra skipulags BHM: „Við þurfum að taka lög bandalagsins til ítarlegrar skoðunar með það að markmiði að auka sveigjanleika BHM og aðdráttarafl,“ sagði Friðrik og bætti við að tímabært væri að skoða fjármögnun bandalagsins, húsnæðismál þess og fleira.

Opið samtal um bætt samskipti og vinnubrögð á vinnumarkaði

Í ræðu sinni benti Friðrik á að fjórir mánuðir væru til alþingiskosninga og að BHM myndi hefja samtal við fulltrúa flokkanna í aðdraganda þeira um hagsmunamál sín: „Samtal sem við munum síðan fylgja eftir í kjölfar kosninga við nýja ríkisstjórn og jafnt og þétt í aðdraganda nýrra kjarsamninga.“

Hann sagði einnig að bandalagið myndi hafa frumkvæði að samtali við aðra aðila á vinnumarkaði um umbætur: „Við eigum strax að hefjast handa við að þrýsta á um opið samtal um bætt samskipti og vinnubrögð á íslenskum vinnumarkaði til næstu framtíðar með fagmennsku, gagnvæma virðingu, jafnrétti og réttlæti að leiðarljósi.“

Bíðum ekki eftir næstu bylgju frásagna

Meðal þess sem Friðrik gerði að umtalsefni í ræðu sinni voru sögur þeirra kvenna sem að undanförnu hafa stigið fram opinberlega undir merkjum #MeToo: „Þið eruð ekki einar, ég er viss um að aðildarfélög og félagsfólk BHM stendur með ykkur, öll sem eitt.“

Hann sagði að stjórnvöld og aðilar vinnumarkaðarins yrðu að grípa umsvifalaust til aðgerða og innleiða skýra verkferla til að koma í veg fyrir ofbeldi og áreitni á vinnumarkaði og styðja þolendur í leit að réttlæti og aðstoð.

„Bíðum ekki eftir næstu bylgju frásagna. Leggjum okkur öll fram við að uppræta ofbeldi, áreitni og einelti hvar sem er og hvenær sem er. Sérstaklega við sem njótum forréttinda. Felum okkur ekki á bakvið þau, heldur göngumst við þeim og beitum þeim þá frekar til góðs. Styðjum, virðum og stöndum með,“ sagði Friðrik.

Ræða Friðriks Jónssonar í heild sinni 

Upptaka af ræðunni í heild sinni



Fréttir