• Thorunn

Gengið á orlofsdagana

Grein Þórunnar Sveinbjarnardóttur, formanns BHM, í Fréttablaðinu 25. mars 2020

25.3.2020

Foreldrar barna á leik- og grunnskólaaldri neyðast margir til að ganga á orlofsdagana sína vegna skertrar skólagöngu barna. Ekki þarf að fjölyrða um ástæðurnar. Kórónuveirufaraldurinn hefur sett samfélagið úr skorðum og öll erum við að glíma við afleiðingar hans með einum eða öðrum hætti. Stjórnvöld hafa nú þegar gripið til aðgerða og munu greiða hlutabætur með starfsfólki í skertu starfshlutfalli til maíloka. Einnig fá þau laun sem þurfta að fara í sóttkví. Eftir stendur að kjör foreldra leik- og grunnskólabarna munu versna við þessar aðstæður.

BHM skorar á vinnuveitendur að taka tillit til foreldra leik- og grunnskólabarna sem ekki geta sinnt störfum sem skyldi vegna skertrar kennslu í skólum landsins. Margir foreldrar reyna að sinna fjarvinnu ásamt því að annast heimakennslu barna sinna. Það er gefur augaleið að slíkt getur reynst flókið og umönnun yngstu barnanna þarf að njóta forgangs á heimilinu. Við þessar aðstæður gengur launafólk á orlofsrétt sinn og er jafnvel að taka launalaust leyfi frá vinnu. Eins og alltaf þegar að kreppir þá finna hóparnir sem standa lakast efanhags- og félagslega mest fyrir samdrættinum. Einstæðir foreldrar eru þar augljóslega í verri stöðu en aðrir. Það er með öllu óviðunandi.

BHM biðlar því til stjórnenda fyrirtækja og stofnana að koma til móts við það starfsfólk sem glímir við þessar aðstæður og greiða því full laun á meðan samkomubann gildir hér á landi. Með því móti sýna atvinnurekendur samfélagslega ábyrgð í verki. Það mun án nokkurs vafa skila sér til baka þegar til langs tíma er litið.

Öll getum við lagst á eitt um að létta þessar vikur fyrir fólkið, fyrirtækin og heimilin í landinu. Þegar það versta er yfirstaðið verður gott að geta litið um öxl fullviss um að allt hafi verið gert til að tryggja atvinnuöryggi, rekstur fyrirækja og almenna velferð landsmanna á tímum COVID-19 heimsfaraldursins.