Ég fagna því að niðurstaða hafi náðst í kjaraviðræðum á almennum markaði. Þó samningar til lengri tíma væru jafnan æskilegri þá er skammtímasamningur bæði skynsamleg og eðlileg niðurstaða á þessum tímapunkti, meðal annars vegna efnahagslegra óvissuþátta.
Í ljósi þessarar niðurstöðu væri skynsamlegt að fulltrúar aðildarfélaga BHM eigi fund með formanni samninganefndar ríkisins án tafar og kanni möguleikann á að flýta viðræðum.
Auk hefðbundinna kjarabóta þarf að eiga sér stað virkt samtal um þau atriði sem brenna á aðildarfélögum BHM, meðal annars þau sem sett voru fram í megináherslum okkar þegar jafnréttissamningurinn var kynntur í byrjun nóvember.
Ég hvet því formann samninganefndar ríkisins, Kristínu Lindu Árnadóttur, til að boða tafarlaust til fundar. Það er ekki eftir neinu að bíða. Við í BHM erum tilbúin til viðræðna strax.
Friðrik Jónsson, formaður BHM
