Í umsögn til fjárlaganefndar Alþingis tekur BHM undir markmið um hallalaus fjárlög og lækkandi skuldahlutfall, enda geti slíkt dregið úr verðbólguþrýstingi og styrkt efnahagslegan stöðugleika. Bandalagið leggur þó áherslu á að trúverðugleiki áætlunarinnar ráðist ekki eingöngu af grunnsviðsmynd heldur af gagnsæjum forsendum og því hvort hún hafi svigrúm til að bregðast við áföllum eða flóknum samfélagslegum viðburðum.
BHM bendir á að einhliða fækkun starfsfólks í opinberri þjónustu geti aldrei verið sjálfstætt markmið. Slík áform beri að taka af yfirveguðu ráði og í samræmi við breytingar á verkefnum eða verklagi. Einhliða fækkun beri hins vegar í sér hættuna á að biðlistar eftir þjónustu lengist, álag á starfsfólk aukist og kostnaður hækki þegar til lengri tíma er litið.
Í umsögninni vekur BHM athygli á framlögum til háskóla og rannsókna, þau séu hlutfallslega lág í alþjóðlegum samanburði, sem veiki forsendur framleiðnivaxtar og þar með langtímahagvaxtar. Það stangast á við metnaðarfull áform í nýrri atvinnustefnu stjórnvalda.
Að lokum undirstrikar BHM að öldrun þjóðarinnar muni auka eftirspurn eftir opinberri þjónustu á næstu árum, sem kalli á skýrari langtímasýn í opinberum fjármálum. Aðhald sem grafi undan mannauði hins opinbera geti dregið úr þjónustugæðum og samkeppnishæfni ríkisins sem vinnuveitanda.
Umsögnin var send fjárlaganefnd Alþingis 4. maí 2026.
