Ungt háskólamenntað fólk situr eftir

Litlar kaupmáttarhækkanir meðal háskólamenntaðra gætu orðið að engu

Ef aðeins er horft til launabreytinga, þ.e. án áhrifa styttri vinnutíma, má sjá að kaupmáttaraukning meðal háskólamenntaðra hjá BHM var á bilinu 5-10% á tímabilinu 2019-2021. Á sama tíma mældist kaupmáttaraukning félagsmanna ASÍ 8-27%. Fari verðbólga hækkandi á næstu misserum er hætt við að kaupmáttaraukning háskólamenntaðra eftir kjaralotuna þurrkist út.

Stóðu höllum fæti fyrir kjarasamningslotuna

Á tímabilinu 2010-2019 jókst kaupmáttur atvinnutekna meðal háskólamenntaðs fólks á aldrinum 25- 34 ára um 14-24% en mismunandi eftir stigi háskólamenntunar*. Á sama tíma jókst kaupmáttur meðal grunnskóla- og framhaldsskólamenntaðra á sama aldri um 36-40% eða nær tvöfalt meira. Þróunin á síðustu tveimur árum bætti gráu ofan á svart.

BHM lýsir yfir þungum áhyggjum af þeirri þróun sem orðið hefur í kjörum háskólamenntaðra síðustu ár. Mismunandi áhrif krónutöluhækkana á launahækkanir eftir launastigi í kjarasamningslotunni 2019-2021 hafa komið verulega niður á hvata ungs fólks til að mennta sig. Að auki hafa lágtekjumiðaðar skattkerfisbreytingar á síðasta kjörtímabili minnkað hvatann til menntunar enn frekar. Ljóst er að vanmat menntunar á Íslandi er orðin sérstök efnahagsleg áskorun.