Ljósmynd: Hrafn Jónsson / ASÍ
Samningar til ársins 2028 hafa nú verið gerðir fyrir nær allt launafólk á bæði almenna og opinbera markaðnum. Í lotunni voru undirritaðir um 250 kjarasamningar sem ná til um 189.000 félagsmanna stéttarfélaga. Stærsti samningurinn í febrúar 2025 var sameiginlegur samningur ríkis og sveitarfélaga við öll aðildarfélög Kennarasambands Íslands (KÍ), sem byggði á tillögu ríkissáttasemjara og var frábrugðinn öðrum samningum í lotunni.
Sundurliðuð gögn KTN um launaþróun liggja fyrir til janúar 2025 og er töluverður munur á þróun milli markaða frá upphafi samningalotunnar í febrúar 2024. Laun hækkuðu mest á almenna markaðnum þar sem tvær kjarasamningsbundnar hækkanir komu til framkvæmda en minna á opinberum markaði þar sem aðeins ein hækkun var á tímabilinu og samningum kennara var ólokið. Önnur hækkun á opinberum vinnumarkaði kom til framkvæmda í apríl 2025 og samningum kennara lauk í febrúar sem ekki endurspeglast í gögnum KTN að þessu sinni.
Við mat á kaupmætti kemur fram að hann jókst um 4,2% að meðaltali, þar sem aukningin var mest á almennum markaði (5,3%) en minni á opinbera markaðnum (1,0–1,4%). Krónutöluhækkanir í samningum hafa áfram stuðlað að jöfnun launa og dregið úr bili milli hæstu og lægstu launa, einkum á opinbera markaðnum.
