Reikni­vél fyr­ir út­selda vinnu

Reiknivélin er gagnlegt verkfæri fyrir sjálfstætt starfandi sérfræðinga til að reikna út sanngjarnt verð á útseldri vinnu. Hún tekur mið af lögbundnum gjöldum, launaliðum og réttindum sem fylgja þeim sem starfa á vinnumarkaði sem launamenn, samkvæmt lögum og kjarasamningum.

Einnig er reiknað með gjöldum í sjúkrasjóði og starfsmenntasjóði aðildarfélaga BHM.

Þannig tryggir reiknivélin að gjald fyrir útselda þjónustu endurspegli bæði verðmæti þeirrar þjónustu og sérfræðiþekkingar sem félagsmaður býr yfir og nauðsyn þess að fólk tryggi sér mikilvæg réttindi til jafns við launafólk, eins og réttinum til orlofs og stuðnings úr sjóðum stéttarfélaga.

Til að sjálfstætt starfandi einstaklingur njóti sömu verndar og launamaður, þarf tímagjaldið a.m.k. að dekka eftirfarandi þætti:

1. Launaliðir: Laun, tekjuskattur og útsvar.
2. Lögbundin gjöld: Tryggingagjald (greiðist til ríkisins) og iðgjöld í lífeyrissjóð (bæði 4% hlutur launþega og 11,5% mótframlag).
3. Sjóðagjöld stéttarfélaga: Framlög í sjúkrasjóð, orlofssjóð og starfsmenntasjóð (venjulega um 2-3% samtals).
4. Starfskostnaður: Skrifstofa, hugbúnaður, tölvubúnaður og ábyrgðartrygging.
5. Umsýsla o.fl.: Gjald fyrir þann tíma sem fer í ýmis konar stjórnsýslu, markaðssetningu og námskeið.