BHM leggur áherslu á menntun, nýsköpun og sjálfbærni í atvinnustefnu Íslands
28. ágúst 2025
BHM hefur skilað umsögn um áform stjórnvalda um atvinnustefnu Íslands til ársins 2035.
Í umsögninni tekur BHM jákvætt í framtíðarsýn stjórnvalda um fjölbreytt og arðbært atvinnulíf byggt á nýsköpun, sjálfbærni og samkeppnishæfni, en leggur jafnframt áherslu á mikilvæga þætti sem tryggja þurfi til að markmiðin nái fram að ganga. BHM minnir á að samtök launafólks gegni lykilhlutverki í mótun atvinnustefnu og að samráð við þau verði að vera markvisst og raunhæft. Félagsfólk BHM starfar á öllum sviðum samfélagsins og háskólamenntað vinnuafl er forsenda öflugs atvinnulífs, nýsköpunar og framleiðni.
Sjálfbær þróun og menntun lykilatriði
BHM leggur áherslu á að atvinnustefnan verði byggð á þremur stoðum sjálfbærrar þróunar og að ekki verði fjallað um hagvöxt án þess að á sama tíma horft sé til samfélagslegra og umhverfislegra áhrifa. Þá þurfi að efla háskóla og rannsóknir og snúa við niðurskurði undanfarinna ára til að tryggja samkeppnishæfni atvinnulífsins til framtíðar.
Framtíðarstörf og skapandi greinar
Í umsögninni bendir BHM á að atvinnustefnan verði að endurspegla vaxandi vægi atvinnugreina sem byggja á menntun, rannsóknum, sköpun og nýrri tækni. Sérstök athygli er vakin á því að skapandi greinar séu lykilþáttur í verðmætasköpun og útflutningstekjum víða um heim en fái ekki nægilega umfjöllun í áformaskjalinu.
