Félög BHM undirbúa kvennaverkfallið 24. október

Formenn fimm aðildarfélaga innan BHM — þær Eva Hauksdóttir, formaður Félags lífeindafræðinga, Katrín Sigurðardóttir, formaður Félags geislafræðinga, Laufey Elísabet Gissurardóttir, formaður Þroskaþjálfafélags Íslands, Steinunn Bergmann, formaður Félagsráðgjafafélags Íslands, og Þóra Leósdóttir, formaður Iðjuþjálfafélags Íslands — birtu í dag sameiginlega skoðanagrein á Vísi þar sem þær fjalla um mikilvægi kvennaverkfallsins, um stöðu heilbrigðisstétta innan BHM og hvetja til þátttöku á morgun.

Allar helstu upplýsingar um daginn má finna á kvennaar.is.

Dagskrá kvennaverkfallsins í Reykjavík hefst á Sögugöngu um merka áfanga í íslenskri kvennabaráttu klukkan 13:30 á horni Sóleyjargötu og Njarðargötu og lýkur á útifundi á Arnarhóli klukkan 15:00. Tónlistaratriði, ræður og kvennakraftur - það jafnast ekkert á við að finna fyrir samstöðukrafti kvenna og kvára.

BHM hvetur félagsfólk sitt til að taka virkan þátt í deginum, standa saman og minna á mikilvægi jafnréttis á vinnumarkaði. Við mætum þar til við þurfum ekki að mæta lengur.