Laun BHM-félaga hjá ríki hækka um 1,24%

Tilgangur launatöfluauka er að tryggja að launaþróun opinberra starfsmanna haldist í hendur við þróun launa á almennum markaði. Ákvæði um hann er að finna í viðauka kjarasamninga stéttarfélaga við opinbera launagreiðendur. Við útreikningana var meðal annars byggt á gögnum Hagstofu Íslands og leiðrétt fyrir áhrifum kjarasamningsbundinna breytinga.

Af 22 aðildarfélögum BHM, sem gera kjarasamninga við ríkið, höfðu 16 uppfyllt skilyrði launatöfluauka um áramótin. Sálfræðingafélag Íslands er þar á meðal en felldi sinn samning í atkvæðagreiðslu í janúar, því er enn til skoðunar með hvaða hætti félögum SÍ verður tryggður launatöfluauki til jafns við aðra hópa BHM.

Fulltrúi Kennarasambands Íslands (KÍ) skrifaði undir niðurstöðu nefndarinnar en gerði fyrirvara um að launatöfluauki ætti einnig að taka til félaga innan KÍ. Kennarasambandið hefur óskað eftir aðkomu ríkissáttasemjara að lausn málsins.