Slíkar kröfur eiga sérstaklega við um hjúkrunarfræðinga, lækna, ljósmæður og aðrar starfsstéttir í framlínu heilbrigðisþjónustunnar, sem þurfa að geta skilið og miðlað mikilvægum upplýsingum, brugðist við óvæntum aðstæðum og unnið náið með öðru fagfólki. Í slíkum tilvikum eru góð og nákvæm samskipti ekki einungis fagleg krafa, heldur einnig lykilatriði í öryggi sjúklinga og siðferðislegri ábyrgð heilbrigðisstarfsins.
BHM tekur undir þau skilaboð sem fram koma í ályktun aðalfundar Félags íslenskra hjúkrunarfræðinga um mikilvægi tungumálakunnáttu í heilbrigðisþjónustu. Stjórnvöld geta ekki opnað vinnumarkaðinn fyrir erlent fagfólk í heilbrigðisþjónustu nema um leið sé fjárfest í markvissri tungumálakennslu. Landspítalinn og ýmsar aðrar heilbrigðisstofnanir hafa stigið ákveðin skref í þá átt, en ljóst er að gera þarf meira.
Í lögum og reglugerðum kemur fram að heimilt sé að setja skilyrði um íslenskukunnáttu sem hluta af skilyrðum fyrir starfsleyfi. Hins vegar er mikilvægt að slíkar kröfur séu málefnalegar og í samræmi við eðli viðkomandi starfs. Ekki er sjálfgefið að öll störf í heilbrigðisþjónustu kalli á samskipti við sjúklinga eða almenning, því þarf að skoða kröfurnar um íslenskukunnáttu í samhengi við raunveruleg verkefni viðkomandi.
Óhóflegar kröfur um tungumálakunnáttu, sem hamla að óþörfu aðgengi erlendra sérfræðinga að störfum, geta farið gegn lögum um jafna meðferð og talist óbein mismunun. Það á sérstaklega við um sérfræðinga frá EES-ríkjum, en Ísland er bundið af reglum aðildarríkjanna, sem heimila að gerðar séu hóflegar og réttmætar tungumálakröfur svo lengi sem þær varða markmið um öryggi og gæði þjónustu.
Til að mæta brýnni mannaflaþörf heilbrigðiskerfisins þurfa stjórnvöld að axla ábyrgð og fjárfesta í markvissum tungumálanámskeiðum og stuðningsúrræðum fyrir erlent heilbrigðisstarfsfólk. Það er liður í að byggja tungumálabrú milli menntaðra fagaðila innan kerfisins í þágu öryggis, gæða þjónustunnar og inngildingar erlendra sérfræðinga í íslenskt samfélag. Það er einnig forsenda þess að Ísland geti laðað til sín og haldið í það fjölbreytta og mikilvæga starfsfólk sem hingað vill koma og vaxandi heilbrigðiskerfi þarfnast.
Stöndum saman um örugg, skýr og ábyrg samskipti í heilbrigðiskerfinu og vöndum til verka án þess að útiloka fólk að óþörfu frá vinnumarkaði. Tryggt aðgengi að tungumálanámi og aðlögun stuðlar að raunverulegum árangri og réttlátri þátttöku í íslensku samfélagi.
