Úthlutunarreglur

Styrktarsjóður er fyrir félagsfólk BHM á opinberum markaði, hjá ríki eða sveitarfélögum.

Sótt er um styrki til sjóðsins á Mínum síðum BHM. Meginregla í úthlutunarreglum sjóðsins er að að greitt hafi verið framlag vegna sjóðfélaga í samtals 6 mánuði og þar af 3 mánuði samfellt áður en það tekjutap eða útgjöld sem sótt er um átti sér stað. Á þessu geta þó verið undantekningar samkvæmt reglum.

Helstu atriði í úthlutunarreglum

Eftirfarandi er útdráttur úr formlegum úthlutunarreglum sjóðsins. Ef misræmi reynist milli þessa útdráttar og reglnanna gildir það sem fram kemur í þeim.

Varðandi útfærslu á einstökum styrkjum og upphæðir þeim tengdum vísast í hinar formlegu úthlutunarreglur.

Nýjar reglur Styrktarsjóðs

Þann 1. september taka gildi nýjar og bættar reglur sjóðsins.

Reglurnar hafa verið einfaldaðar, útvíkkaðar og eldri styrkflokkar endurvaktir með það að leiðarljósi að mæta væntingum og þörfum sjóðfélaga.

Kynningarsíða Skjal með nýjum reglum

Umsóknir

Sótt er um styrki til sjóðsins í gegnum Mínar síður BHM.

Gögn skulu send inn rafrænt með umsókn. Nauðsynleg gögn verða að liggja fyrir til að sjóðfélagi geti fengið greitt úr sjóðnum. Nánari upplýsingar um nauðsynleg gögn eftir styrkflokkum má finna á Mínum síðum eða í úthlutunarreglum sjóðsins.

Nauðsynleg gögn eru í flestum tilfellum sundurliðaðir reikningar með nafni umsækjanda sem sannanlega eru greiddir af sjóðfélaga sjálfum. Á reikningnum þurfa að vera upplýsingar um þann sem gefur reikninginn út, fjöldi skipta og dagsetningar meðferða eða kaupa á vöru eða þjónustu. Greiðslukvittun þarf einnig að fylgja umsókn ef ekki kemur fram á reikningi að hann sé greiddur. Sjóðurinn áskilur sér rétt til að óska eftir frumriti reiknings áður en útborgun á sér stað.

Dæmi um löglegan reikning

Afgreiðsla umsókna

Umsóknir eru að jafnaði afgreiddar vikulega. Meginreglan er að réttur til styrkveitinga úr sjóðnum fellur niður sé ekki sótt um innan 12 mánaða frá því að til útgjalda var stofnað. Réttur til styrkveitinga úr sjóðnum fellur niður að liðnum 3 mánuðum frá því síðast var greitt iðgjald til sjóðsins.

Greiðsla sjúkradagpeninga fer að jafnaði fram í lok hvers mánaðar. Sjúkradagpeningar eru að hámarki greiddir í þrjá almanaksmánuði afturvirkt miðað við umsóknarmánuð.

Sjóðsaðild

Almennt gildir að réttur sjóðfélaga til úthlutunar úr sjóðnum er háður því að greitt hafi verið sjóðsframlag vegna sjóðfélaga samtals í 6 mánuði og þar af 3 mánuði samfellt áður en tekjutap eða útgjöld, sem veita rétt til styrks úr sjóðnum, áttu sér stað.

Heildarlaun að upphæð 539.733 krónum (iðgjöld 4.048 kr. eða hærri) eða hærri veita rétt á hámarksstyrk úr sjóðnum. Heildarlaun undir fyrrgreindri upphæð veita rétt á hálfum styrk.

Fæðingarorlof: Sjóðfélagar sem fara í fæðingarorlof og velja að greiða stéttarfélagsgjald meðan á því stendur halda áunnum réttindum.
Í veikindum: Sjóðfélagi sem hefur fullnýtt rétt sinn til sjúkradagpeninga nýtur áfram annarra réttinda í sjóðnum í allt að 12 mánuði stofni hann ekki til réttinda annars staðar, sama á við um sjóðfélaga sem eru á endurhæfingarlífeyri TR.
Atvinnulausir: Sjóðfélagar með full réttindi við upphaf atvinnuleysis halda réttindum sínum í eitt ár, enda hefjist sjúkradagpeningatímabil eða til útgjalda sé stofnað, innan árs frá upphafi atvinnuleysis. Skilyrði er að greitt sé félagsgjald til viðkomandi stéttarfélags. Stéttarfélögum er heimilt að lengja þetta tímabil svo lengi sem sjóðfélagi þiggur greiðslur frá Vinnumálastofnun, enda beri þau ábyrgð á greiðslu 0,75% iðgjalds til sjóðsins af atvinnuleysisbótum frá upphafi atvinnuleysistímabils. Stéttarfélög skulu tilkynna sjóðnum fyrir hvaða sjóðfélaga þau greiða inn fyrir
Launalaust leyfi: Sjóðfélagar sem fara í launalaust leyfi frá störfum eða foreldraorlof viðhalda rétti á styrkjum, skv. kafla 5 og 6, í allt að sex mánuði. Réttur til úthlutunar miðast við að sjóðfélagi hafi hafið störf að nýju. Sjúkradagpeningar greiðast ekki vegna veikinda í launalausu leyfi.
Við starfslok eða töku lífeyris: Sjóðfélagar halda réttindum til annarra styrkja en sjúkradagpeninga í 6 mánuði eftir að þeir láta af störfum og fara á örorku- eða á eftirlaun. Réttur til sjúkradagpeninga fellur niður þegar taka örorku- eða eftirlauna hefst að fullu, þó í síðasta lagi við 70 ára aldur, sé sjóðfélagi ekki í ráðningarsambandi.
Yfirfærsla réttinda: Við yfirfærslu úr Sjúkrasjóði BHM til Styrktarsjóðs BHM öðlast sjóðfélagi rétt til úthlutunar eftir fyrstu iðgjaldagreiðslu ef viðkomandi, fyrir það greiðslutímabil, átti rétt til úthlutunar úr Sjúkrasjóði BHM. Sama á við um aðra sjóði annarra stéttarfélaga, enda veiti sá sjóður fyrrum sjóðfélögum Styrktarsjóðs BHM sams konar rétt. Sé greitt iðgjald fyrir sjóðfélaga í fleiri en einn sjóð þá gildir ákvæði 2.1. um ávinnslu.

Út­hlut­un­ar­reglur