Atvinnurekendum er skylt að koma upp hlutlægu, áreiðanlegu og aðgengilegu kerfi vegna skráningar á vinnutíma starfsmanna sinna þar sem meðal annars koma fram upplýsingar um:
- daglegan og vikulegan vinnutíma,
- á hvaða tíma sólarhrings unnið er, og
- samfelldan hvíldartíma og vikulegan frídag.
Einnig skulu skráðar upplýsingar um tilvik þar sem vikið hefur verið frá reglum um hvíldartíma og vikulegan frídag sem og upplýsingar um hvort starfsmenn hafi í slíkum tilvikum fengið hvíld síðar.
Nægjanlegt er að vinnutími starfsmanns sé skráður í ráðningarsamningi sé vinnutími hans reglubundinn að jafnaði og skulu frávik frá þeim vinnutíma þá skráð sérstaklega í samræmi við framangreindar reglur.
Starfsmaður skal eiga þess kost að nálgast upplýsingar um skráningu síns vinnutíma, frávik o.s.fr. 12 mánuði aftur í tímann.
Framgreind ákvæði um skráningu vinnutíma koma fram í lögum um aðbúnað, hollustuhætti og öryggi á vinnustöðum.
Í lögunum er ekki gerð krafa um tiltekna aðferð eða tækni við skráningu vinnutíma.