Frestun / flutningur orlofs
Þær aðstæður geta skapast að starfsfólk getur ekki tekið orlof á hefðbundnum tíma og þarf að fresta því til síðari tíma.
Frestun orlofs
Veikindi
Veikist starfsmaður í orlofi, telst sá tími sem veikindum nemur ekki til orlofs, enda sanni starfsmaður með læknisvottorði að hann geti ekki notið orlofs.
Er þá heimilt að fresta töku orlofs, og eftir atvikum að flytja ótekið orlof til næsta árs, sbr. 6. gr. orlofslaga.
Í kjarasamningi aðildarfélaganna og SA eru ákvæði um frestun orlofs vegna veikinda, tilkynningu veikinda o.fl. í grein 3.3.
Fæðingarorlof
Starfsmaður í fæðingarorlofi getur farið fram á frestun á töku orlofs. Skal orlofið ákveðið í samráði vinnuveitanda og starfsmanns, en þó eins fljótt og unnt er, eftir að fæðingarorlofi lýkur. Uppsafnað orlof getur aldrei orðið meira en 60 dagar, sbr. grein 4.6. í kjarasamningi aðildarfélaga BHM og ríki.
Sambærileg ákvæði eru í kjarasamningi aðildarfélaga BHM og sveitarfélaganna.
Að beiðni yfirmanns
Hjá ríki og sveitarfélögum gildir að sé orlof eða hluti orlofs tekið utan sumarorlofstímabils, að beiðni yfirmanns, skuli sá hluti orlofsins lengjast um 25%.
Á almennum vinnumarkaði skulu þeir sem að ósk atvinnurekanda fá ekki 20 orlofsdaga á sumarorlofstímabilinu (2. maí til 15. september) eiga rétt á 25% álagi á það sem vantar á 20 dagana, sbr. grein 3.2.3 í kjarasamningi SA og BHM.
Flutningur orlofs milli orlofsára
Miklu skiptir að starfsfólk nýti á hverju ári orlofsrétt sinn til að hvíla sig og njóta frítíma síns með sínum nánustu. Uppsöfnun orlofs og flutningur milli ára samræmist ekki markmiðum orlofslaga, nema réttmætar ástæður séu fyrir hendi.
Framsal orlofslauna og flutningur þeirra á milli orlofsára er óheimilt, sbr. 13. gr. orlofslaga.
Starfsmaður skal því hafa lokið töku áunnins orlofs fyrir lok orlofsársins, þ.e. fyrir 1. maí.
Fyrning
Kjarasamningar heimila eins og áður segir frestun á töku orlofs vegna veikinda eða fæðingarorlofs. Frestun getur því eftir atvikum leitt til flutnings á orlofsrétti starfsmanns milli orlofsára.
Í slíkum tilvikum getur uppsafnað orlof þó aldrei orðið meira en 60 dagar. Nýti starfsmaður ekki hina uppsöfnuðu orlofsdaga fyrnast þeir.