Til­kynn­ing veik­inda

Tilkynning veikinda

Ef þú veikist eða verður fyrir slysi sem veldur því að þú getur ekki sinnt vinnu þinni er mikilvægt að þekkja þau skref sem þarf að taka og þau réttindi sem þú átt.

Hvernig á að tilkynna veikindi?

Meginreglan er einföld: Tilkynna ber vinnuveitanda um óvinnufærni vegna veikinda eða slyss eins fljótt og auðið er.

Hvenær þarf læknisvottorð?

• Eftir 5 vinnudaga: Ef þú ert fjarverandi í meira en fimm vinnudaga samfleytt skaltu sýna fram á óvinnufærni með læknisvottorði.
• Endurteknar eða langvarandi fjarvistir: Yfirmaður eða forstöðumaður getur ákveðið að þú þurfir að skila læknisvottorði fyrr eða oftar ef um endurtekin forföll er að ræða.
• Kostnaður: Vinnuveitandi á alltaf að endurgreiða þér kostnað vegna þeirra læknisvottorða sem hann krefst, ásamt kostnaði vegna sjálfrar læknisvitjunarinnar.

Hvert er hlutverk trúnaðarlæknis vinnuveitanda?

Í kjarasamningum aðildarfélaga BHM er kveðið á um að yfirmaður geti, í ákveðnum tilvikum, leitað til trúnaðarlæknis til að fá úr því skorið hvort forföll séu réttmæt. Yfirmaður getur krafist vottorðs frá trúnaðarlækni:

1. Strax í kjölfar þess að veikindi eru tilkynnt.
2. Til að meta starfshæfni þína þegar þú snýrð aftur til starfa.
3. Til að meta hvort um varanlega óvinnufærni sé að ræða.

Athugaðu: Þér er skylt að gangast undir venjulegar og viðurkenndar læknisrannsóknir sem trúnaðarlæknir telur nauðsynlegar til að skera úr um lögmæti forfalla, enda greiði vinnuveitandi allan kostnað.

Er mér skylt að mæta í skoðun eða viðtal hjá trúnaðarlækni?

Samkvæmt dómum Félagsdóms og Landsréttar (mál nr. 3/2022 og nr. 168/2022) er starfsfólki almennt ekki skylt að mæta til skoðunar eða viðtals hjá trúnaðarlækni vinnuveitanda.

Dómstólar lögðu áherslu á eftirfarandi atriði:

• Persónuvernd og stjórnarskrá: Heilsufar fólks telst til einkamála sem njóta verndar stjórnarskrárinnar. Það er íþyngjandi krafa að skylda starfsmann til að mæta á fund trúnaðarlæknis.
• Frjálst val: Samkvæmt lögum um réttindi sjúklinga átt þú rétt á að leita til þess læknis sem þér hentar best.
• Engin sjálfkrafa mætingarskylda: Vinnuveitanda er óheimilt að setja almennar reglur sem skylda allt starfsfólk til að mæta sjálfkrafa til trúnaðarlæknis eftir ákveðinn fjölda veikindadaga.

Hvenær getur skoðun samt átt við?

Þótt engin almenn skylda sé til staðar geta komið upp aðstæður þar sem skoðun eða viðtal er nauðsynlegt.

Ef trúnaðarlæknir telur sig ómögulega geta gefið út vottorð um (ó)vinnufærni án þess að hitta þig eða skoða og þú neitar að mæta getur það haft afleiðingar. Í slíkum tilfellum getur læknirinn neitað að staðfesta óvinnufærnina, sem getur leitt til þess að vinnuveitandi líti svo á að fjarvistir þínar séu ekki réttmætar.

Leitaðu upplýsinga um þinn rétt

Hafðu samband við þitt stéttarfélag ef ágreiningur kemur upp við atvinnurekanda vegna veikinda og fjarvista af þeim sökum.